【同住奶奶好惡頂】呻生完BB特別討厭老爺奶奶　新手媽：老爺教埋身餵奶

新抱和老爺奶奶相處真是一個大學問，有女網民近日在社交網站facebook投稿，狂呻老爺奶奶忽視自己坐月需要休息，剛生完孩子在醫院時，已安排不熟的親戚前來探訪，坐月期間又經常上門，老爺更教埋身餵奶「正確方法」，奶奶就爭湊孫，還叫新抱坐地下餵奶。文章一出引起不少新抱共鳴。

該名女網民在facebook群組「同住奶奶好惡頂」投稿，指不是與老爺奶奶同住，在未生孩子前，雙方相處還算客氣，但自從誕下孩子後，發現老爺奶奶好煩好討厭，她舉例，

首先係在醫院時，佢哋安排唔熟嘅親戚探訪，之後坐月時佢哋又成日要上嚟探b，我攰到死都要應酬，好辛苦，佢哋一上嚟就好熱心 ，抱住bb唔放，我要餵奶都唔走開，總之上嚟咁耐就攪住阿b咁耐，100%專注在bb的所有細微細眼嘅嘢上。

樓主又稱，老爺奶奶在育兒方面給很多意見，如孩子的床墊在人工力學上獲得超好評論，但他們會稱，「bb床墊唔好，會整親bb個頭」

62（老爺）仲教我埋身餵奶的「正確方法」，真係滴汗，99（奶奶）叫我坐地下餵奶…

樓主還呻，到孩子滿月時想兩家人包廂吃飯慶祝，都被老爺奶奶以人多易有菌為由，禁止擺滿月酒，甚至稱，「如果我哋擺，佢會抱bb出去出面。」

樓主又稱，每次老爺奶奶上門探孫時，就會連同丈夫三人和bb玩，「講晒佢哋嘅家鄉話，又叫我唔使湊，去做自己嘢，我心裡很不是味兒，覺得自己勁被排外。佢哋可能真係想幫我手，想我抖下，但唔知點解，就係勁唔鍾意。」

樓主最後抱怨，每次帶孩子去見老爺奶奶，他們都會搞亂孩子的生理時鐘，

佢哋成日抱阿b, 好哋哋瞓咗喺架車度又要抱起來，我知佢哋好鍾意bb，但真係太誇張， 日間邊行邊抱，係都要抱到bb瞓著都唔放低，搞到bb夜晚唔肯瞓，開始識扭抱。

樓主還分享，有一次bb心情不太好，被老爺奶奶輪住抱後即大哭，最後她需以餵奶為由，才可抱回孩子，但入房埋身餵時，老爺奶奶小姑輪住入來，根本沒機會哄bb，最後bb被奶奶抱走，在無法哄回孫子情況下，最終才肯將孩子給孩子爸爸抱，當見孩子不哭，竟稱只有爸爸才可以搞掂，完全忽視她的存在。

文章一出引起網民熱議，有網民稱，樓主的一番話是她身同感受，「坐月期間真的要謝絕不必要的人來探訪，要好好休息。」；大批網民轟樓主丈夫是豬對友，不會幫口，建議樓主與丈夫好好溝通，讓丈夫體諒自己；有網民為該名新抱打氣加油。